Act 25 | BOJ | STEP | Ariya Festus a Judia sawaq aisiq Sisaria qureq di soqnej. Bati qalub koboonaqa a dena tigelosiqa Jerusalem qureq aiej.

Acts 25

Pol a marej, “E Sisar aqa ulatamuq di tigelqai.”

1 Ariya Festus a Judia sawaq aisiq Sisaria qureq di soqnej. Bati qalub koboonaqa a dena tigelosiqa Jerusalem qureq aiej. 2 Aisiq di sonaqa atra tamo kokba ti Juda tamo bole bole ti naŋgi bosib Festus aqa ulatamuq dia tigelosib Pol aqa jejamuq di olo anjam qamoqneb. Osib Festus minjeb, “Ni na anjam qariŋyosim ino qaja tamo naŋgi endegsim minjre, ‘Niŋgi Sisaria qureq dena Pol osib Jerusalem osib boiye.’ Minjrimqa gago are boleqas.” Naŋgi degsib Festus minjeb. Di kiyaqa? Naŋgi nami anjam endegsib qoseb. Qaja tamo naŋgi na Pol osi boqnibqa gamq dia naŋgi Pol qalsib moiotqab. 4 Onaqa Festus na kamba minjrej, “Pol a Sisaria qureq dia tonto talq di unu. Bati qudei koboamqa e segi olo Sisaria qureq aiqai. 5 Deqa niŋgi na nuŋgo tamo kokba naŋgi endegsib minjriye, ‘Niŋgi Pol qa anjam bei soqnimqa Festus dauryosib Sisaria qureq aiiye. Aisib dia Festus aqa ulatamuq di tigelosib Pol aqa une minjib a quqwas.’ Nuŋgo tamo kokba naŋgi degsib minjriye.”

6 Festus a bati 8-pela o 10-pela Jerusalem qureq di sosiqa olo puluosiq Sisaria qureq aiej. Aieqnaqa Juda tamo kokba qudei naŋgi a dauryosib aieb. Nebeonaqa Festus a aqa awo jaram kobaq di awoosiqa aqa qaja tamo qudei naŋgi minjrej, “Niŋgi Pol osib boiye.” Onaqa naŋgi na Pol osi bosib Festus aqa ulatamuq di tigelteb. 7 Onaqa Juda tamo kokba Festus dauryosib beb qaji naŋgi Pol kalilyosib Festus aqa ulatamuq dia tigelosib anjam gargekoba laŋa laŋa Pol aqa jejamuq di qameleŋoqneb. Naŋgo anjam di utru saiqoji. 8 Onaqa Pol a kamba marej, “E Juda gago dal anjam bei gotraŋyosaieqnum. E gago atra tal qa anjam uge bei marosaieqnum. E Rom naŋgo mandor koba Sisar a dego kumbra uge bei yosaieqnum. Deqa e une saiqoji.”

9 Pol a degsi marnaqa Festus a na Juda tamo kokba naŋgo are boletetnjrqajqa deqa Pol endegsi nenemyej, “Ni Jerusalem aisim dia ijo ulatamuq di tigelosim ino anjam olo marqa kere e?” 10 Onaqa Pol na minjej, “E bini Sisar aqa awo jaram namoq endi tigelejunum. Endia ijo anjam marqai. Ni qalie, e Juda naŋgi qa une bei yosai. Deqa e kiyaqa Jerusalem aiqai? 11 Une kobaquja bei ijo jejamuq di soqnimqa uŋgum e lubsib moiotbeb. Ariya anjam naŋgi ijo jejamuq di qameqnub qaji di bolesaiamqa naŋgi e laŋa osib qaja tamo naŋgo baŋq di atqa keresai. Deqa ni que. E Rom qaji tamo. Deqa ni na e qariŋbimqa e Rom qureq gilsiy dia Mandor Koba Sisar aqa ulatamuq di tigelqai. Yimqa a na ijo anjam qusim gereiyqas.” 12 Pol a na Festus degsi minjnaqa a warumq dena oqedosiqa aqa qaja tamo qudei naŋgi koba na anjam qairosib olo warum miligiq gilsiqa Pol minjej, “Ni Sisar aqa ulatamuq dia tigelqa maronum deqa e ni qariŋmitqa Sisar aqaq gilqam.”

Festus a Pol qa kumbra kieryqas deqa mandor koba Agripa nenemyej

13 Onaqa bati qudei koboonaqa Rom naŋgo mandor koba bei aqa ñam Agripa naŋgi aqa jaja Bernaisi wo Festus unqajqa marsib Sisaria aieb. 14 Aisib bati gargekoba yala Sisaria qureq di sonabqa Festus na Agripa minjej, “Tamo bei aqa ñam Pol a nami Feliks na tonto talq di waiyej unu. 15 Deqa e Jerusalem di sonamqa Juda tamo kokba ti Juda tamo bole bole ti naŋgi na Pol aqa jejamuq di anjam qamsib endegsib merbeb, ‘Ni mare, “Pol a une ti.” Osim ni na ino qaja tamo naŋgi minjrimqa naŋgi Pol qalib moiem.’ 16 Onaqa e na kamba endegsi minjrem, ‘Iga tamo bei laŋa ojsim qaja tamo naŋgo baŋq di atqa keresai. Rom gago kumbra degsi sosai. Deqa niŋgi Pol qa anjam bei soqnimqa a mati ijo ulatamuq dia tigelamqa niŋgi aqa une marib qusimqa a kamba aqa anjam marqas.’

17 “E na Juda tamo kokba naŋgi anjam degsi minjrnamqa naŋgi e daurbosib Sisaria qureq beb. Bonab e tariŋosai. Nebeonaqa naŋgi koroesonabqa e ijo awo jaramq dia awoosim ijo qaja tamo qudei naŋgi minjrnamqa naŋgi Pol osi bosib ijo ulatamuq dia tigelteb. 18 Onaqa Juda tamo kokba naŋgi tigelosib Pol aqa jejamuq di anjam gargekoba qameleŋoqneb. E are qalem, naŋgi une kokba Pol aqa jejamuq di qamqab. Naŋgi degyosai. 19 Naŋgi naŋgo Qotei louqa kumbra deqa segi ŋiriŋosibqa Pol aqa jejamuq di anjam qamoqneb. Pol a maroqnej, ‘Tamo bei aqa ñam Yesus a moisiq olo subq na tigelej.’ Deqa ti naŋgi ŋiriŋosibqa Pol aqa jejamuq di anjam laŋa qamoqneb. 20 Onaqa e naŋgo anjam deqa utru itqa yonam keresaiibonaqa Pol nenemyem, ‘Ni Jerusalem aisim dia ijo ulatamuq di tigelosim ino anjam marqa kere e?’ 21 E degsi Pol minjnamqa a saidosiq merbej, ‘E Rom qaji tamo. Deqa e mati tonto talq endi sqai. Bunuqna ni na e qariŋbimqa e Rom qureq gilsiy dia Mandor Koba Sisar aqa ulatamuq di tigelqai. Yimqa a na ijo anjam qusim gereiyetbqas.’ Pol a na e degsi merbonaqa e ijo qaja tamo naŋgi minjrem, ‘Niŋgi Pol osib tonto talq di waiysib taqatesoqniye. Bunuqna e na Pol qariŋyitqa Sisar aqaq gilqas.’” 22 Festus a na Agripa degsi minjnaqa Agripa na minjej, “E dego Pol aqa anjam quqwai.” Onaqa Festus na minjej, “Nebe ni aqa anjam quqwam.”

23 Ariya nebeonaqa Agripa wo Bernaisi wo naŋgi gara wala boledamu jigsib koro sawaq beqnabqa tamo uŋgasari naŋgi na unjrsib naŋgo ñam soqtoqneb. Qaja tamo naŋgo gate kokba ti tamo ña ñam ti kalil naŋgi dego bosib koro sawaq di koroeb. Onaqa Festus a na aqa qaja tamo naŋgi minjrnaqa naŋgi Pol osi bosib Agripa aqa ulatamuq dia tigelteb. 24 Onaqa Festus na Agripa minjej, “O Mandor Koba Agripa, Pol agi osi bonub. Ni unime. Niŋgi kalil koroonub qaji endi niŋgi dego Pol uniye. E Jerusalem qureq di sonamqa Juda tamo uŋgasari kalil naŋgi Pol aqa jejamuq di anjam gargekoba qameleŋoqnsib murqumyoqnsib endegsib merboqneb, ‘Ni Pol qalim moiem. A olo mandamq endi saiq.’ Bosib Sisaria qureq endia dego Pol aqa jejamuq di anjam qamoqnsib e degsib merboqneb. 25 Ariya e Pol aqa jejamuq di une kobaquja bei unosai. Deqa e Pol laŋa moiotqa keresai. Ariya Pol na merbej, ‘E Mandor Koba Sisar aqa ulatamuq dia tigelqai. Yimqa a na ijo anjam qusim gereiyetbqas.’ Onaqa e na Pol minjem, ‘Di kere. E ni qariŋmitqa Rom qureq gilqam.’ 26 O Mandor Koba Agripa, e Pol aqa jejamuq di une bei unosai. Deqa e a qa anjam kie neŋgreŋyit gago tamo koba Sisar aqaq gilqas? Laŋa qariŋyqai di Sisar a ŋiriŋqas. Deqa e Pol osi bosim ino ulatamuq endia tigeltonum. Di kiyaqa? Ni segi na Pol nenemyimqa aqa une bei babtimqa niŋgi kalil qusib merbibqa une deqa neŋgreŋyit Sisar aqaq gilqas. 27 E are qalonum, tamo a une saiqoji soqnimqa e laŋa qariŋyit Sisar aqaq gilqas di kumbra bolesai.”